من اجل ما كتب الشاعر :صرخة في وجه الظلم والتعسق وبصقة في والوجه القبيح
وهذا بعض ما جاء في الكتاب
المعصرة
1.
أُعصُرْ
أُعصُرْ
ظلَّكْ أعصُرْ
تا يِصفى هَـ الزِّيتْ
إللِّي بِدُّو يْنولْ يُصْبُرْ
ما يْقُلِشْ يا ريتْ
ظلَّكْ أُعصُرْ.. أعصُرْ أعصُرْ
تا يِصفى هَـ الزِّيتْ
2.
خَلِّي المعاصِرْ تُعْصُرْنا
حتَّى بَلْكي.. نْفيقْ
مِنْ هَـ الذُّلِّ اللِّي مْحاصِرْنا
وْماخذينو طَريقْ
نِمْنا.. نمنا.. نمنا كْثيرْ
واتْعَوَّدْنا إنَّا نْصيرْ
نُصّ_ِ بْيوكِلْ لَحْمِ النُّصّ
وْلَعورِةْ غيرو ـ بِيبُصّ
ولَلْغَلَطْ ما نْقُولُّو هُصّ
وِالأخو عَ أخوهْ يْعُصّ
وِالأعوَجْ
ناخذو صَديقْ
خَلِّي المعاصِرْ تُعْصُرْنا
بَلْكي اللّهْ
بُكْرَهْ نْفيقْ
3.
أُعْصُرْ .. أعْصُرْ
ظَلَّكْ أُعْصُرْ
حتَّى يْموتِ اللِّي ما بُصْبُرْ
واللِّي ما تْعَوَّدْ عَ الضِّيقْ
أُعْصُرْ أعْصُرْ
ظَلَّكْ أُعْصُرْ
غيرِ الحرّ ما واحَدْ يُعْبُرْ
مِشْ يِمْكِنْ هَالأمِّهْ تْفيقْ
4.
أُعْصُرْ أعْصُرْ
وْإبْدا فيِّ
أُعْصُرْ لا تِشْفَقْ عَلَيِّ
أنا واحَدْ مِنْ هذا الشَّعْبْ
إللِّي مْعَشِّشْ فِيُّو الْكِذْبْ
واللِّي ما بِخافِ الرَّبّْ
إلاَّ في أوقاتِ الضِّيقْ
أُعْصُرْ .. أعْصُرْ
ظَلَّكْ أُعْصُرْ
مِشْ يِمْكِنْ هَالأمِّهْ تْفيقْ
--------------------------------------------------------------------------------
الغربال
غَرْبِلْ
غربِلْ
غربِلْ
ظلَّكْ غربِلْ يا غِرْبالْ
اللِّي باعْ ضَميرو
وِانْشَرى بِالمالْ
وِاللِّي بْلَحْظَهْ يْصيرو
بَوَّاسينْ نْعالْ
غَرْبِلْ
غربِلْ
غربِلْ
ظلَّكْ غربِلْ يا غِرْبالْ
*
غَرْبِلْ هَـ اللِّي
طَعَنوا الشَّعْبِ الحُرِّ بْظَهْرو
غربِلْ هَـ اللِّي
خَلُّوا الحُرِّ يْموتْ مِنْ قَهْرو
غربِلْ هَـ اللِّي ظَلِّ يْعوهِرْ
حتَّى
غطَّى سْهولْ وِجْبالْ عُهْرو
غَرْبِلْ .. غربِلْ .. غربِلْ
ظلَّكْ غربِلْ يا غِرْبالْ
*
غربلْ هَـ الناسِ اللي نَهَبوا
واللي سَرَقوا كُلْشي وْهَرَبوا
خلُّوا الشعِبْ يِشْكي تَعَبو
خَلُّوا الغلبانْ يِشْكي غُلْبو
غربِلْ غربِلْ هَـ اللي انْكَلَبوا
وْمالوا
لَمَّا الدَّهِرْ مالْ
غَرْبِلْ .. غربِلْ.. غربِلْ
ظلَّكْ غربِلْ يا غِرْبالْ
*
غربلْ يَ اللي خايِنْ أهلو
غربِلْ يَ اللي غَدَروا وْقَتَلوا
غربِلْ حتّى تُقْصُفْ أجَلو
وْيِنْداسْ تَحْتِ النِّعالْ
غربل يَ اللي خايِنْ وَطَنو
وِاللي حضَّرْ لأخوهْ كَفَنو
غربِلِ الكافِرْ مَعْ وَثَنو
خَلِّي حالو تِبْقى حالْ
غَرْبِلْ .. غربِلْ .. غربِلْ
ظلَّكْ غربِلْ يا غِرْبالْ
*
غربِلْ كُلّ الْ مالْهُمْ ذِمِّهْ
غربِلْ يَ اللي هَدَموا الأمِّهْ
غربِلْ زُعمانا بالقِمِّهْ
غربِلْ ما تْخَلِّي مُحْتالْ
وَلا نَصَّابْ وَلا دَجَّالْ
غَرْبِلْ .. غربِلْ .. غربِلْ
ظلَّكْ غربِلْ يا غِرْبالْ
*
غَرْبِلْ اللِّي دَمُّنْ مَيّْ
يَ اللي أَكَلوا اللَّحْمِ النِّيّْ
يَ اللي طَعَنونا بالْقَلْبْ
يَ اللي خانوا بْنُصِّ الدَّرْبْ
وْفوقِ الْجُرْحِ الْمِلِحْ رَشُّوا
وْما في قَبِرْ إلاَّ وْنَبَشوا
غربِلْ يَ اللي جُوَّا كَرْشو
ماكِلْ لَحْمِ النَّاسْ حَيّْ
غَرْبِلْ غربِلْ غربِلْ
غربِلْ يا غِرْبالْ
*
غربِلِ وْلادِ الْحَرامْ
وِالْـ بَلا ذِمِّهْ وِالأقْزامْ
غربِلْ ما تْقُلِشْ حَرام..
دُولا ما عِرْفوا الْحَرامْ
دولا شِرْبوا دَمِّ النَّاسْ
دولا داسو عَ الإحْساسْ
دولا جابو وَجَعِ الرَّاسْ
دولا أنْجَسِ الأنْجاسْ
غَرْبِلْ .. غربِلْ .. غربِلْ
غربِلْ يا غِرْبالْ
من كتابه " المعصرة " .
--------------------------------------------------------------------------------
عن موقع الشاعر سهيل عيساوي
•
•
•
•
•
•
•
•
•
•
•
•
•••
•••
•••
•••
•••
•••
•••
•••
•••
•••
•••
•••
•••
•••
•••
•••
•••
•••
